( حواء تحت السيطرة )

كتبت : منى حامد
معلهش كده ولا مؤاخذة ، الستات تركن يمين و الرجَّالة شمال ، عايزين بجد نتكلم بوضوح و نكشف المستور ..
يعني إيه سِت و السؤال للرجَّالة ؟؟
طبعا أحلى بوء و أحلى قِوالة ؛ ست أشهر و نكدية و مفترية و كيَّادة .
طب يعني إيه راجل ؟! مستعجلين تعرَفو ؟!
عيوني ليكم ، مع حفظ الألقاب آخر نقاوة و أجمد حاجة مِن قديم الزمان .
راجل يعني ( سي السيّد ) يعني الصمت مهابة وحنكة وذكاوة .
وساعات يعني طيبة و هبل حسب الحالة .
يعني سي السيّد ساكت و القصد خانس ؛ ضاربها طناش و سايب المدام تبَعْبَع و تتكلم . ( حويط ) يعرف منها المسْتخبّي و يركِّبها الغلط ، و هو هادي إبن حلال مصفِّي .
وراجل يعني (سبع الرّجال و سبع اللّيل ) – بروم برومبو المثل زي مابيقولوا – بس ده كمان بحالات و حسب المَزاجات .
فجأة تلاقيه غيَّر رأيه و بقى يا حرام ، بيغرق في شبر ميَّة ؛ ضارب لخمة ؛ و محتاج سيدة القصر تِواليه في البيت ، شاي وقهوة يانسون و لو حكم شربات ما تخلّيش .
و راجل يعني (حسَّاس ) و كل يوم يرجع بصُداع على دوخة . أمَّا الست مهما تكون راجعة معاه ؛ هو له النوم و هي تشيل و تحط و القوة حديد غدا و عشا و تحابيش .
وراجل يعني ( إبن ذوات ) يعني من الأخر ؛ لازم يبقى شيك . و الست هانم فخورة إنها لهلوبة في المقاسات ، يبقي تنزل تنقّي و تجيب .
و إبن الذوات الصبح يقيس . و عادي تسمع تعليق : مش وقته !! وكان ليه ؟ وده بكام ؟ و هو أنا محتاج !! لاااء لا سمح الله .
وسي السيد (إنف و مالوش في الأكلات ) يعني تاكل إيه ؟! أي حاجة !! رد مريح و ما فهوش تجريح ، و المعنى واضح من غير تحريف – محشي و محمر و مشمر – أطبخي يا جارية حاضر ياسيدي ..
و الباشا ( بيتوتي ) مالوش في الخروجات ؛ لا مولات و لا كافيهات .
بس هو بس صاحبه الأنتيم ، صاحب وحيد و لازم يجامله يوماتي في الخروجات .
و( سي الأستاذ) واضح وصريح .. من الأول سن قانون و الشرط نور بيحب المخللات و يموت في الحلويات ، و يعشق اكل البيت .
غلبانة حواء أعلنت و بدون تفكير بتموت في الريجيمات .
آخرها التوست و الجبنة قريش .
و صعبان عليَّ يا (ولداه ) تلقاه بيغنّى و الصوت حيَّاني : إدّيني من حُبك هسَّة !! أصلها يا حرام مش حاسَّة ، و يا فايتني و لا على بالك !! معلش ناقص حنان و عايز بصَّة و المدام مفيش في قلبها رحمة .
شوفتوا اللّي فيها !! صحيح الستات هي اللّي كيَّادة و مُفتريَّة و تستاهل ست أُشهر حبس إنفرادي .
سامعاكي ياللّي بتقولي : ( أنا اللي جبته لنفسي) .